Fjárfesta í neytendageiranum

Eignarhaldsfélagið Arev og Icebank hafa stofnað nýjan einkafjármagnssjóð, Arev N1. Sjóðurinn hefur allt að þrjá milljarða króna til fjárfestinga í íslenskum neytendavörufyrirtækjum á sviði heildsölu, smásölu og þjónustu. Þetta mun vera eini sjóðurinn með þessu sniði hérlendis sem fjárfestir í neytendavörufyrirtækjum.

Elín Jónsdóttir, framkvæmdastjóri Arev, segir mikla fjárfestingamöguleika í geiranum enda hafi fáir sjóðir komið að honum með sama hætti og Arev N1.

Einkafjármagnssjóðurinn mun fjárfesta fyrir 50 til 200 milljónir króna að jafnaði í hverju því fyrirtæki sem uppfylla skilyrði hans en jafnan er um að ræða fyrirtæki sem hyggja á breytingar eða sjá fram á mikinn vöxt og þurfa því á fjármagni að halda. Kaupin nema um 30 til 50 prósentum af hlutafé fyrirtækja og er stefnt að því að eiga hann í nokkur ár. Með fjárfestingunni kemur einstaklingur frá sjóðnum í stjórn fyrirtækjanna og mun hann vinna náið með stjórnendum fyrirtækja sem sjóðurinn fjárfestir í.

Arev N1 er byggður á grunni eignasafns sem Eignarhaldsfélagið Arev hefur byggt upp í gegnum árin en í því eru fyrirtæki á borð við Áltak, Sól, Vínkaup, Yggdrasil og Lífsins tré.