Ekki hafa fyrir því að afsaka

Chris Coleman knattspyrnustjóri Fulham er æfur af reiði og lætur Martin Atkinson dómara fá það óþvegið í breskum fjölmiðlum eftir 4-2 tap sinna manna gegn Man Utd í ensku úrvalsdeildinni í gær. Heiðar Helguson skoraði annað marka Fulham þegar hann minnkaði muninn í 3-2 en það sem gerðist eftir það fór svo fyrir brjóstið á Coleman að hann var rekinn úr gryfjunni með rauða spjaldið upp í stúku.

Ruud van Nistelrooy var rangstæður þegar hann fékk boltann og gaf á Louis Saha sem skoraði annað mark Man Utd gegn sínum gömlu félögum og segir Coleman þetta atvik hafa rænt sína menn stigi á Old Trafford. Kröftug mótmæli Fulham-stjórans í kjölfarið þótti dómaranum um of og vísaði honum á brott.

Coleman segir þessi mistök dómarans ófyrirgefanleg. "Allir gera mistök og ég hef fengið dómara til að viðurkenna slíkt áður. En þegar mistökin eru svona svakaleg er ég ekki viss um að ég geti tekið því. Þetta var hreinlega ótrúlegt, ég get engan veginn sætt mig við þetta." segir Coleman sem vill sjá dómurum mun oftar refsað fyrir slæma dómgæslu.

"Þegar ég geri mistök sem knattspyrnustjóri varðandi liðsval eða leiktaktík þá er mér refsað. Ef aðrir gera mistök finnst mér að þeim ætti að vera refsað fyrir það. Þannig sé þetta alla vega." sagði Colemen súr í bragði.

Hann var þó ánægður með sína menn í leiknum. Heiðar var í byrjunarliði Fulham en var skipt út af á 75. mínútu eftir að hafa átt nokkur góð marktækifæri og skorað annað markið. "Mér fannst strákarnir vera frábærir. Þeir spyrntu hælunum niður og settu tvö mörk og við vorum alltaf inni í leiknum."