Það er heiður að spila með svona liði

Hinn ungi framherji argentínska landsliðsins, Carlos Tevez, segir að liðsandinn hafi verið lykillinn að 6-0 stórsigri liðsins á Serbum og Svartfellingum í dag. Tevez kom inná sem varamaður í leiknum og skoraði ótrúlegt mark eftir einstaklingsframtak.

"Þegar lið okkar stendur saman sem einn maður, mun það ná árangri. Það var frábært að sjá hvað menn spiluðu vel hver fyrir annan og það er mér heiður að fá að spila með liði sem er fullt af ótrúlegum leikmönnum," sagði Tevez.

Maxi Rodriguez, sem skoraði tvö mörk í leiknum, var ánægður með sigurinn en benti á að liðið væri hvergi nærri hætt. "Þetta var ótrúleg frammistaða í dag, en við þurfum að vinna næsta leik líka. Stefnan hjá okkur er að vinna Hollendingana líka og fá fullt hús stiga," sagði Rodriguez.