Jólin kosta þjóðina átta milljarða króna

Jólin kosta þjóðina átta milljarða króna, fyrir utan virðisaukaskatt, ef spá Rannsóknarseturs verslunarinnar gengur eftir. Átta milljarðar samsvara því að hvert mannsbarn eyði um þrjátíu þúsund krónum, með virðisaukaskatti, í jólin á þessu ári.

Býsna væn summa en samkvæmt spánni sem var kynnt á blaðamannafundi Rannsóknarsetursins og Samtaka verslunar og þjónustu í morgun, er þó gert ráð fyrir að heldur dragi úr þeim vexti sem orðið hefur í jólaverslun síðustu tvö árin. Ekki svo að skilja, það verður samt vöxtur. Í könnun setursins kemur fram að tveir þriðju Íslendinga gera jólainnkaupin ekki fyrr en í desember. Og það er af sem áður var þegar Íslendingar fóru í flugvélaförmum til útlanda í jólagjafaleiðangra því tæp sjötíu prósent landsmanna kaupa allar jólagjafir á Íslandi. Tæp 60% landsmanna hyggjast verja innan við 75 þúsund krónum í jólagjafir.

Og það er greinilegt að íslenskar konur vilja vera enn sætari um jólin en á öðrum árstímum því tæp þrjátíu prósent af allri sölu á snyrtivörum fer fram í nóvember og desember.