Leikmenn Arsenal voru latir

Ashley Cole lætur fyrrum félaga sína í Arsenal hafa það óþvegið í ævisögu sinni sem fljótlega kemur út, en kaflar úr henni hafa verið birtir í dagblaðinu The Times. Þar segir Cole að aðalástæða þess að Arsenal gekk illa í deildinni á síðustu leiktíð hafi verið leti og aumingjaskapur leikmanna.

"Það er sorgleg staðreynd að nokkrir leikmenn voru of latir og spiluðu fyrir sjálfa sig á síðustu leiktíð og þeir gerðu líka afdrifarík mistök sem kostuðu okkur. Sumir þeirra sinntu því engu þó væri verið að vaða yfir okkur á vellinum og sýndu félögum sínum ekki stuðning. Ég reyndi að láta í mér heyra og koma með uppbyggilega gagnrýni, en menn tóku því allt of persónulega og töluðu ekki við mig í viku á eftir - svo ég reyndi á endanum bara að halda mér saman," sagði Cole.