Boulahrouz kominn til Chelsea

Enska úrvalsdeildarfélagið Chelsea gekk í dag formlega frá kaupum á hollenska varnarmanninum Khalid Boulahrouz frá þýska liðinu Hamburg. Leikmaðurinn er talinn hafa kostað Englandsmeistarana um 6 milljónir punda og hefur skrifað undir fjögurra ára samning. Hann er 24 ára gamall og hefur spilað 15 landsleiki fyrir Holland.

"Það er mjög mikilvægt að hafa á að skipa fjölhæfum leikmönnum í ensku knattspyrnunni þar sem aðeins er leyfilegt að tefla fram 16 manna hóp í deildarleiki og því er Boulahrouz okkur mikill fengur," sagði Jose Mourinho, stjóri Chelsea - en leikmaðurinn getur spilað allar fjórar varnarstöðurnar.