Liverpool náði aðeins jafntefli við nýliðana

Leikmenn Liverpool naga sig eflaust í handabökin í dag eftir að hafa aðeins náð jafntefli við nýliða Sheffield United í fyrsta leiknum í ensku úrvalsdeildinni á þessu tímabili. United komst yfir eftir 52 sekúndur í síðari hálfleik með marki frá Rob Hulse, en Robbie Fowler jafnaði úr víti fyrir Liverpool eftir að Steven Gerrard var brugðið innan teigs.

Þetta verða að teljast gríðarleg vonbrigði fyrir bikarmeistara Liverpool því eflaust hefur Rafa Benitez knattspyrnustjóri óskað sér að ná í þrjú stig í fyrsta leik, enda krafa stuðningsmanna liðsins sú að vera með í baráttunni um Englandsmeistaratitilinn þetta árið.