Ekkert mál að skora gegn ítölsku vörninni

Franski framherjinn Thierry Henry segist ekki hafa áhyggjur af því að hann og félagar hans geti ekki skorað gegn sterkri vörn Ítala í úrslitaleiknum á HM á sunnudaginn. Ítalska vörnin hefur verið mjög traust á mótinu til þessa, þar sem þeir Cannavaro og Zambrotta frá Juventus hafa verið sérstaklega áberandi. Þá hefur Marco Materazzi staðið sig frábærlega í fjarveru Alessandro Nesta.

"Vissulega eru varnarmenn Ítalanna sterkir, en það er ekki hægt að stilla þessu upp eins og þetta sé ég á móti Cannavaro. Þetta er viðureign tveggja sterkra liða. Ég hef samt ekki miklar áhyggjur af vörninni hjá Ítölunum, mér tókst að skora gegn þessum mönnum með Arsenal í meistaradeildinni og af hverju ætti ég þá ekki að geta það með landsliðinu?" sagði Henry.