Brasilía

Brasilíumenn eru í F riðli með Króötum, Áströlum og Japönum. Þeir ættu að sigla mjög auðveldlega í gegnum þennan riðil án vandkvæða. Enda tróna þeir á toppi styrkleikalista FIFA.

Heimsmeistararnir eru sigurstranglegasta liðið á mótinu með marga af bestu knattspyrnumönnum heims innanborðs. Menn eins og Ronaldinho, Ronaldo, Kaka og Roberto Carlos eiga eftir að skemmta áhorfendum með sínum alkunna "sambabolta".

Þjálfari liðsins er Carlos Alberto Parreira. Hann er hokinn af reynslu enda hefur hann stýrt fjórum mismunandi liðum í lokakeppninni. Þau eru auk Brasilíu: Kúveit, Sádí-Arabía og Sameinuðu Arabísku Furstadæmin. Parreira sýrði Brasilíumönnum til sigurs á HM í Bandaríkjunum árið 1994.

Það kom ekkert á óvart í vali Parreira á leikmannahópi Brasilíumanna enda má segja að þessi hópur velji sig sjálfur.

Hinn magnaði Gaucho Ronaldinho sem er af mörgum talinn allra besti knattspyrnumaður heims kemur til með að vera aðalmaðurinn í liðinu. Þetta lið er hins vegar hópur af snillingum sem hafa aðeins eitt markmið, að vinna heimsmeistarakeppnina.

Fyrirliði: Cafu

Lykilmaður: Ronaldinho

Gæti slegið í gegn: Adriano