ESB menn deila um aðild Íslands að ESB

Tveir hæst settu menn Evrópusambandsins gáfu í dag misvísandi yfirlýsingar um hugsanlega aðild Íslands að sambandinu. Yfirmaður stækkunarmála sagði að Ísland gæti orðið næst í röðinni, á eftir Rúmeníu og Búlgaríu, en framkvæmdastjóri ESB sagði síðdegis að ekki væri hægt að horfa til fleiri landa en þeirra sem þegar hafa sótt um aðild. Á morgunverðarfundi Evrópumálastofnunar í Brussel í morgun var Olli Rehn, framkvæmdastjóri stækkunarmála, spurður hvernig hann sæi landamæri Evrópusambandsins fyrir sér. Hann sagðist telja landamærin í suður nokkuð ljós, einnig í vestur og líklega í norður. Vandinn væri hversu langt þau ættu að ná í austur. En svo bætti hann við, óaðspurður, að Ísland eða Króatía gætu komið næst, líklega eftir 2009 þegar búið væri að samþykkja nýja stjórnarskrá og stokka upp fjárlög sambandsins. Eftir að alþjóðlegar fréttastofur greindu frá málinu í dag sá aðalframkvæmdastjóri ESB, Jose Manuel Barroso, ástæðu til að slá á puttana á félaga sínum í framkvæmdastjórninni því hann notaði tækifærið í heimsókn til Kaupmannahafnar í dag til að draga úr væntingum um inngöngu Íslands. Barroso sagðist ekki sjá fyrir sér inngöngu fleiri ríkja en þegar væri verið að semja um. Um Ísland sagði hann: "Að sjálfsögðu nýtur Ísland virðingar í Evrópu og ég er viss um að almenn viðbrögð yrðu jákvæð ef Íslendingar vilja ganga í sambandið." En hann bætti við að hann hefði engar óskir heyrt frá Íslendingum um að þeir hefðu áhuga á að gerast aðilar. Reuters fréttastofan sá hins vegar ástæðu til að minna á að Halldór Ásgrímsson forsætisráðherra hefði spáð ESB aðild Íslands fyrir árið 2015 - en miðað við yfirlýsingar æðstu ráðamanna ESB um málið í dag eru menn tvístígandi um málið í Brussel.