Óviss með að landa Ballack

Jose Mourinho, stjóri Englandsmeistara Chelsea, segist hreint ekki viss um að félagið nái að landa stórstjörnunni Michael Ballack frá Bayern Munchen í sumar, en talið er víst að Þjóðverjinn fari frá Bayern og fram að þessu hefur Chelsea verið talið öruggt með að landa honum.

"Mér sýnist Ballack greinilega vera í vafa um hvað hann eigi að gera í sumar þegar samningur hans rennur út. Hann getur valið á milli þess að vera áfram hjá Bayern eða fara til Chelsea eða Real Madrid, þannig að hann er á milli steins og sleggju í augnablikinu. Ég hef miklar mætur á honum og vil fá hann í Chelsea, svo ég vona bara að hann geri upp hug sinn áður en HM hefst," sagði Mourinho, en framkvæmdastjóri Bayern hefur þegar látið hafa það eftir sér að hann telji víst að Ballack gangi í raðir Chelsea í sumar.