Efla þarf Landhelgisgæsluna

Flugbjörgunarsveit Varnarliðsins hefur bjargað á fjórða hundrað mannslífum frá árinu 1971, þegar sveitin hóf starfsemi í Keflavík.

Það er ekkert í Varnarsamningnum sem kveður á um að varnarliðið veiti þessa aðstoð, sem reynst hefur svo mikilvæg gegnum tíðina, fyrir utan samkomulag sem gert var árið 1996, til fimm ára, og er löngu runnið úr gildi.

Bandaríkjaher hefur séð til þess að fjórar björgunarþyrlur og ein til vara hafa verið til taks á Suðurnesjum. Þær geta farið hvenær sem er. Verða allavega farnar fyrir lok septembermánaðar samkvæmt tilskipun bandarískra stjórnvalda og ekki er vitað hvort átt er við daga eða mánuði í því sambandi.

Eftir standa tvær þyrlur Landhelgisgæslunnar, SIF og LÍF, sem staðið hefur sundurtætt í flugskýli á Reykjavíkurflugvelli frá 13. febrúar.

Útköll hafa í seinni tíð verið á bilinu 110 til 160 á ári. Flest í tengslum við leitar, björgunar og sjúkraflutninga bæði á hafi úti og inni á landi. Auk þess hafa SIF og LÍF sinnt hinum ýmsu verkefnum auk sjálfrar landhelgisgæslunnar.

Ekki náðist í forstjóra Landhelgisgæslunnar í dag en innanbúðarmenn segja

ljóst að ef ávallt eigi tvær þyrlur ávallt að vera til taks til björgunaraðgerða þurfi Landhelgisgæslan að eignast þrjár þyrlur til viðbótar, til að vera nokkuð örugg, fjórar til fimm ef gerð er sú krafa að öryggistig flugbjörgunar verði haldið í horfinum.Yfirvofandi sjálfstæði íslensku þjóðarinnar í björgunarmálum gæti því reynst dýrt, en að óbreyttu styttist óðum sá tími sem hægt verður að leita aðstoðar varnarliðsins á ögurstundu.