Forsetinn staðfestir áhuga sinn á Fabregas

Fernando Martin, nýkjörinn forseti Real Madrid á Spáni, hefur nú staðfest að félagið hafi mikinn áhuga á að fá til sín hinn unga Cesc Fabregas hjá Arsenal og segir hann einmitt manninn sem spænska liðið þurfi í sínar raðir.

Fabregas spilaði mjög vel í leikjum Real Madrid og Arsenal í Meistaradeildinni á dögunum og segir forseti Real hann einmitt vera manninn sem sitt lið vanti á miðjuna. "Hann er frábær leikmaður. Hann er ungur og ákafur og á mjög bjarta framtíð fyrir sér. Við verðum að ná í svona leikmann - því hann er einmitt það sem við þurfum," sagði Martin.

Í gær lýsti Arsene Wenger því yfir að hann gæti notast við David Beckham hjá Real Madrid, en tók það fram að hann væri ekki búinn að tala við hann því hann væri samningsbundinn spænska liðinu.