Félagsmenn BHM segja upp störfum

Tugir háskólamenntaðra starfsmanna á sambýlum fatlaðra munu afhenda forstöðumönnum Svæðisskrifstofa málefna fatlaðra á Reykjanesi og í Reykjavík uppsagnarbréf sín í dag. Í flestum tilfellum er um stjórnendur að ræða og rennur uppsagnarfrestur þeirra út eftir mánuð eða þrjá mánuði.

"Dóttir okkar er tvær vikur í mánuði í skammtímavistun svo ef það fellur niður höfum við enga möguleika á að lifa eins og eðlileg fjölskylda," segir Guðrún Sóley Guðnadóttir, móðir Aniku Helgadóttur, 11 ára fjölfatlaðrar stúlku. Hún þarf hjálp við allar athafnir daglegs lífs. "Meðan hún er heima erum við alveg bundin yfir henni og önnur börn okkar fá nær enga athygli svo þessi hálfi mánuður sem hún er í skammtímavistun er okkur afar nauðsynlegur; einnig bara til að hlaða batteríin. Og svo vill maður kannski fara eitthvað eða gera eitthvað," segir Guðrún Sóley. Hún segir að það óöryggi sem skapast sí og æ í þessum geira sé mjög þreytandi fyrir aðstandendur fatlaðra.

Um 50 félagsmenn í BHM stóðu fyrir utan húsnæði BHM í Borgartúni í gær, klöppuðu saman höndum og hrópuðu "semja, semja" þegar samningamenn mættu til fundar. Eftir fundinn kom í ljós að ekkert hafði þokast og var þá ákveðið að fjölmenna á Svæðisskrifstofu málefna fatlaðra á Reykjanesi í morgun og á Svæðisskrifstofu málefna fatlaðra í Reykjavík eftir hádegi og afhenda þar uppsagnarbréfin.

Jón Heiðar Ríkharðsson, framkvæmdastjóri Svæðisskrifstofu málefna fatlaðra í Reykjavík, segir að væntingar hafi verið of miklar í gær. Ekki hafi verið við niðurstöðu að búast en hann vonast til að niðurstaða liggi fyrir um miðjan júlí. "Staðan er viðkvæm en það er allra hagur að málið leysist farsællega og sem fyrst," segir hann.

Gunnlaugur Karlsson er forstöðuþroskaþjálfi á Svöluási í Hafnarfirði. Hann segir að viðræðurnar séu frystar, ráðuneytið vilji ekki veita fjármagni í stofnanasamninga við BHM. Fundur verði á miðvikudaginn og uppsagnir verði dregnar til baka ef samkomulag náist þá.

Gunnlaugur hefur 220 þúsund króna heildargrunnlaun þó að hann sé með sex og hálfs árs háskólamenntun. Hann segir að aðeins hugsjónamenn fari til starfa á sambýlum. Ef félagsmenn BHM hætti störfum hverfi öll fagmenntun úr sambýlunum.

"Það mun verða skelfilegt ástand vægast sagt," segir Sigríður Kristjánsdóttir, framkvæmdastjóri Svæðisskrifstofu málefna fatlaðra á Reykjanesi, en hún hefur fengið tilkynningar frá hátt í tuttugu BHM-félögum síðustu þrjár vikur um að þeir muni segja upp störfum náist ekki samkomulag.