Ég þarf bara eitt mark

Wayne Rooney segir að sjálfstraust hans sé að aukast með hverjum leiknum sem hann spilar fyrir enska landsliðið og segir að það eina sem hann vanti til að ná fullum styrk á ný sé að skora mark á HM.

Rooney lék einn í fremstu víglínu í enska liðinu gegn Ekvador og er bjartsýnn á að vera að finna fjölina sína á ný eftir að hafa smátt og smátt verið að spila sig í leikform eftir meiðsli.

"Það var erfitt að vera einn frammi, en ég fékk góðan stuðning frá miðjumönnunum. Menn spyrja mig hvort ég sé kominn með fullt sjálfstraust eftir að hafa spilað 90 mínútur og í sannleika sagt var ég ánægðastur með síðasta hálftímann sem ég spilaði. Ég veit ekki hvað ég á langt í að ná toppformi, en ég er sáttur við frammistöðu mína í síðustu tveimur leikjum og er viss um að nú vanti mig bara að skora eitt mark - þá sé þetta komið," sagði Rooney.