Figo sleppur með skrekkinn

Luis Figo sleppur við að taka út leikbann þegar Portúgalar mæta Englendingum í 8-liða úrslitunum á HM, þó myndir frá leik Portúgal og Hollands í gær hafi greinilega sýnt að hann skallaði Mark Van Bommel.

Figo fékk að líta gula spjaldið fyrir hegðun sína og þess vegna hefur FIFA ákveðið að aðhafast ekki meira í máli hans. Portúgalska knattspyrnusambandið vonast einnig til að miðjumaðurinn Deco fái að vera með í næsta leik, því sambandið ætlar að áfrýja fyrra gula spjaldinu sem hann fékk í leiknum. Hvorki meira né minna en 16 gul spjöld fóru á loft í leiknum í gær og þar af fjögur rauð - sem er met í keppninni.