Skógarbjörninn skotinn

Björninn Bruno, sem þvælst hefur um fjallahéruð Bæjaralands undanfarnar vikur, var felldur í dag. Bruno kom frá Ítalíu í síðasta mánuði og hafa þýskir og austurrískir bændur verið nokkuð uggandi um ferðir hans. Björninn hafði látið mannfólkið í friði en þess í stað herjað á sauðfénað og kanínur og eyðilagt nokkur býflugnabú í leit að hunangi. Drápið á skógarbirninum hefur mælst misjafnlega fyrir, dýraverndunarsinnar hafa mótmælt því harðlega og sagt að vel hefði mátt deyfa dýrið og flytja það þangað sem engin hætta stafaði af því.