Bylgjan með rauða nefið...

Föstudagurinn 1. desember er Dagur rauða nefsins. Þá mun UNICEF efna til landssöfnunar til handa börnum sem eiga um sárt að binda í Afríku. Markmiðið er að safna heimsforeldrum og verður sérstök þriggja klukkustunda löng söfnunardagskrá í beinni útsendingu og opinni dagskrá á Stöð 2 á föstudagskvöldið.

Útvarpsstöðin Bylgjan mun einnig leggja sitt af mörkum. Föstudagurinn á Bylgjunni verður helgaður Degi rauða nefsins í einu og öllu og munu þáttastjórnendur þá leggjast á eitt allan liðlangan daginn um að minna hlustendur á þetta göfuga söfnunarátak og hvetja þá til að leggja því lið með því að gerast heimsforeldrar.

Bylgjan mun standa fyrir sérstakri söfnun fyrir UNICEF með því að efna til léttrar og skemmtilegrar brandarakeppni milli fyrirtækja og hlustenda. Söfunin á Bylgjunni gengur þannig fyrir sig að einstaklingar og fyrirtæki geta keypt brandara á Bylgjunni föstudaginn 1.desember og mun allt andvirði renna til barnahjálpar UNICEF.

Um er að ræða brandara- og fjáröflunarátak þar sem hlustendur, fyrirtæki eða vinnustaðir senda inn einn brandara sem yrði spilaður þangað til annað fyrirtæki yfirbýður hann til að fá sinn brandara í loftið. Það er annað hvort hægt að kaupa leikinn brandara eða hringja inn og segja eigin brandara.

Allir tiltækir þáttastjórnendur Bylgjunnar munu leggja hönd á plóg og standa vaktina frá morgni til síðdegis eða allt þar til söfnunarátakið hefst á Stöð 2.

Þetta mun vera í fyrsta sinn sem efnt er til slíkrar brandarakeppni í íslensku útvarpi og má með sanni segja að grínið og góðmennskan haldist hönd í hönd og verði vil völd allan föstudaginn á Bylgjunni.

Einnig skal bent á að fyrirtæki geta styrkt UNICEF með því að kaupa rauð trúðanef á allt starfsfólkið sitt. Starfsfólk getur einnig tekið sig saman og skráð sig sem heimsforeldra og styrkt þannig verkefni UNICEF með mánaðarlegum fjárframlögum. Skráningarsíminn er 5 62 62 62.

Bylgjan hvetur alla til að taka þátt og lyfta vinnuandanum í mesta skammdeginu um leið og góðu málefni er lagt lið.