Lætur gagnrýnendur heyra það

Arsene Wenger segir að lið sitt hafi endanlega þaggað niður í hörðum gagnrýnendum þess á undanförnum árum með vasklegri framgöngu sinni í meistaradeildinni í vetur og segist hafa fulla trú á því að sínir menn geti klárað dæmið í úrslitaleiknum.

"Menn hafa efast um hæfi okkar til að ná langt í meistaradeildinni í nokkur ár, jafnvel þó við hefðum yfirburði í ensku úrvalsdeildinni og því er það sérstaklega ánægjulegt að liðið skuli hafa staðið sig svo vel í ár þegar allir afskrifuðu okkur. Við höfum slegið Juventus, Real Madrid og Villarreal út úr keppninni og ég hef fulla trú á að við getum náð alla leið úr þessu. Þegar að úrslitaleiknum kemur mun fólk líka sjá allt annað Arsenal-lið, því þá munum við verða búnir að endurheimta lykilmenn okkar úr meiðslum. Við höfum allt að vinna í úrslitunum," sagði Wenger.