Fæturnir hafa stækkað á göngunni

Jón Eggert Guðmundsson göngugarpur sem þræðir nú strandvegi landsins til þess að afla fé fyrir Krabbameinsfélagið kom í Eyjafjörð í gær. Hann segir gönguna hafa gengið vel hingað til en að fæturnir á sér hafi stækkað á síðustu vikum.

Jón Eggert ákvað í fyrra að verða fyrstur til að ganga alla strandvegi landsins, alls 3300 kílómetra. Í fyrrasumar gekk hann frá heimili sínu í Hafnarfirði og á Egilsstaði, alls 986 kílómetra. Hann hélst svo áfram þar sem frá var horfið 6. maí síðastliðinn þar sem lagði upp frá Egilsstöðum. Síðan þá hefur gengið á ýmsu og hann hefur kynnst íslensku veðurfari vel, allt frá 20 stiga hita til stórhríðar. Jón Eggert segir leiðina frá Vopnafirði til Ásbyrgis hafa verið erfiða enda hafi snjóað mikið.

Síðustu dagar hafa þó verið skárri og gær kom hann í Eyjafjörðinn í rjómablíðu. Hann hafði þá lagt að baki rúmlega helming vegalengdarinnar, eða um 1700 kílómetra.

Hluti af lífsstílsbreytingu

Jóni Eggerti til halds og trausts er vinur hans Sigfús Austfjörð sem keyrir á eftir honum og sér um að útvega mat og gistingu. Hann segir gönguna hluta af lífsstílsbreytingu hjá Jóni og hann sé í mun betra formi en þegar hann hóf gönguna í fyrra. Sigfús segir hann hafa verið 142 kíló áður en hann lagði af stað í fyrra en nú sé Jón Eggert um 120 kíló.

Jón Eggert viðurkennir að Strandvegagangan sé ákveðin bilun. Hann segist ekki hafa fundið fyrir miklum eymslum það sem af er ferðinni en hins vegar hafi fæturnir á honum stækkað. Í upphafi göngunnar hafi hann þurft skó númer 46 en nú þurfi hann númeri stærra. Hann kunni engar skýringar á þessu.

Strandvegaganga er gengin til styrktar Krabbameinsfélagi Íslands. Hægt er að leggja sitt af mörkum með því að hringja í söfnunarsímann 907-5050 og verða þá eitt þúsund krónur innheimtar með næsta símreikningi.