Kuyt á leið til Liverpool

Hollenski landsliðsframherjinn Dirk Kuyt á nú aðeins eftir að gangast undir læknisskoðun svo hann geti gengið í raðir enska úrvalsdeildarfélagsins Liverpool. Enska félagið hefur komst að samkomulagi við Feyenoord um kaupverð og vildi leikmaðurinn ólmur ganga til liðs við þá rauðu.

"Við gerðum allt sem við gátum til að halda honum áfram í herbúðum Feyenoord, en hann ítrekaði að það væri draumur hans að ganga í raðir Liverpool og því gátum við lítið gert til að standa í vegi fyrir því," sagði talsmaður hollenska liðsins.

Kuyt hefur verið einn eftirsóttasti framherji Evrópu í langan tíma og höfðu Tottenham og Newcastle einnig verið á höttunum eftir honum um nokkurt skeið.