Arsene Wenger segir að þó hann hafi um nóg annað að hugsa en enska landsliðið, voni hann sannarlega að varnarmaðurinn Sol Campbell komist í hópinn og spili með Englendingum á HM. Landsliðsþjálfarinn Sven-Göran Eriksson hefur þegar lofað Campbell sæti í hópnum ef hann nær að vinna sér sæti í byrjunarliði Arsene Wenger áður en leiktíðinni lýkur á Englandi og nú er útlit fyrir að Campbell verði í byrjunarliðinu þegar Arsenal mætir Portsmouth á Fratton Park í kvöld.
"Ég er ekkert að velta mér upp úr málum enska landsliðsins en ég yrði ánægður ef Sol gæti spilað bæði með okkur og landsliðinu, því ég tel að hann sé vissulega nógu góður til þess og ég vona að hann komist á HM," sagði Wenger.
