Spila hvernig sem viðrar

„Við höfum aðeins einu sinni sleppt úr fimmtudegi frá árinu 2001,“ segir Guðjón Árnason, einn liðsmanna félagsskapar sem ber hið mjög svo hógværa nafn Meistarar! en það er hópur góðra félaga sem spila golf á hverjum fimmtudegi á Keilisvellinum í Hafnarfirði.

„Þetta eru allt saman strákar sem tengjast FH á einn eða annan hátt,“ útskýrir Guðjón en þeir hafa vakið mikla athygli fyrir mikla hörku og spila átján holur uppi á Keili, nánast hvernig sem viðrar. „Við byrjuðum nokkrir saman árið 2001 með fasta tíma á fimmtudögum en síðan hefur fjölgað í hópnum og við erum orðnir 16 í dag,“ útskýrir Guðjón og bætir við að félagið sé fullmannað. „Menn geta svo sem sótt um aðild ef þeir vilja fá formlega neitun,“ segir hann.

Þegar ljóst var að þessi félagsskapur væri að verða að formlegum „klúbbi“ settust vinirnir niður og lögðust í mikla hugmyndavinnu með nafnið. „Fyrst komu hugmyndir eins og „Kapla-kempur“ eða „Krika-karlar“ með tilvísun til heimavallar Hafnafjarðarstórveldisins,“ segir Guðjón en svo fengu þeir þá flugu í hausinn að kalla sig Meistarar!. „Þetta er komið frá Birgi Björnssyni, vallarverði hjá Keili, og félögum sem skipuðu meistaraflokk FH á árunum 1960 til 1970 og unnu allt sem hægt var að vinna,“ útskýrir Guðjón. „Þeir höfðu þann háttinn á að kasta kveðjunni „Sæll, meistari“ á hvorn annan enda höfðu þeir svo sem efni á því,“ heldur hann áfram. „Við fórum þess því á leit við Birgi að fá að nota þetta nafn og hann gaf að sjálfsögðu góðfúslegt leyfi sitt,“ segir Guðjón.