Brighton sektað vegna Rodman

Lið Brighton Bears í breska körfuboltanum hefur verið sektað og dæmt 20-0 tap í leiknum sem Dennis Rodman lék með því á dögunum eftir að körfuknattleikssambandið þar í landi úrskurðaði að liðið hefði teflt honum fram ólöglega í leiknum.

Rodman mun þó spila meira með liðinu og mun vinna sér inn um 50.000 pund fyrir aðeins þrjá leiki, en húsfyllir hefur verið á þeim leikjum sem hann hefur spilað. Rodman, sem er 44 ára gamall, segist vera að íhuga endurkomu í NBA deildinni og segir tvö lið þegar hafa boðið sér að koma til reynslu á síðustu dögum.