Ballack verður ekki seldur í janúar

Michael Becker, umboðsmaður miðjumannsins Michael Ballack hjá Bayern Munchen, segir að leikmaðurinn verði alls ekki seldur frá Bayern þegar félagaskiptaglugginn opnast í janúar, en fjöldi liða er á höttunum eftir Ballack sem hefur enn ekki gefið upp hvort hann ætli að framlengja samning sinn við Bayern.

"Það er enginn möguleiki að Ballack fari frá Munchen í janúar, enda yrði það út í hött. Í fyrsta lagi gæti hann þá ekki unnið meistaradeildina í sumar, sem er aðal ástæðan fyrir því að hann er að spila fótbolta. Í öðru lagi vill Bayern ekki selja hann því liðið hagnast meira á því að vinna meistaradeildina með hann innanborðs, frekar en að selja hann og í þriðja lagi væri ekki rökrétt fyrir hann að fara frá Þýskalandi svona rétt fyrir heimsmeistarakeppnina þar í landi," sagði Becker.

Ballack hefur sagt að hann muni taka ákvörðun um framtíð sína fljótlega, en framtíð hans er nær örugglega talin liggja annarsstaðar en í Þýskalandi, þar sem hann hefur unnið allt sem hægt er að vinna.