Ferðamenn veltu bíl og fóru

Tveir erlendir ferðamenn voru farnir ómeiddir af vettvangi þegar lögreglu bar að garði þar sem þeir höfðu velt bílaleigubíl sínum í mikilli hálku á Reykjanesbraut við Grindavíkurveg um skömmu fyrir klukkan hálffimm í gærmorgun. Taldi lögregla í Keflavík hugsanlegt að þeir hefðu verið orðnir of seinir í flug. Mikil hálka var á Reykjanesbraut í gærmorgun, en tveir smáárekstrar urðu um svipað leyti. Þá valt bíll á Hafnavegi við Ósbotna um klukkan hálf átta um morguninn eftir að ökumaður missti stjórn á honum í hálku. Farþegi í bílnum var fluttur með sjúkrabíl á Heilbrigðisstofnun Suðurnesja.