Ísland úti í kuldanum

Alþjóða knattspyrnusambandið og Knattspyrnusamband Evrópu samþykktu í gær að Skandinavíudeildin í knattspyrnu, eða Royal League, sem er samstarfsverkefni knattspyrnusambanda Noregs, Danmerkur og Svíþjóðar, fái keppnisleyfi næstu fimm árin. Íslendingum hefur ekki verið boðið að vera með frekar en Finnum. "Það er ekki nokkur spurning að við myndum taka þátt í Royal League ef tækifæri gæfist. Íslensk lið sárvantar erlend verkefni yfir vetrartímann," sagði Guðmundur Árni Stefánsson, formaður knattspyrnudeildar FH, við Fréttablaðið. Skandinavíudeildinni var hleypt af stokkunum síðasta vetur þar sem tólf liðum frá Noregi, Danmörku og Svíþjóð var skipt í þrjá riðla. Keppni hófst 11. nóvember og lauk með úrslitaleik 26. maí. FC Kaupmannahöfn sigraði IFK Gautaborg í úrslitaleiknum og fékk u.þ.b. 100 milljónir íslenskra króna í heildartekjur og því er eftir miklu fjármagni að slægjast enda forráðamenn liðanna í skýjunum með hvernig til tókst. Hvert lið fékk um tíu milljónir króna fyrir riðlakeppnina og svo bónus fyrir stig, útsláttarkeppni og úrslitaleik. Svo vel tókst til með Skandinavíudeildina að þessu sinni að löndin þrjú sem að henni stóðu ákváðu að halda samstarfinu áfram. Tekjur Skandinavíudeildarinnar byggjast á sjónvarpsrétti en að sögn Geirs Þorsteinssonar, framkvæmdastjóra KSÍ, er um álitlegar upphæðir að ræða, eins og reyndar verðlaunaféð gefur til kynna, og ólíklegt að íslenskar sjónvarpsstöðvar hafi bolmagn til þess að greiða slíkt, sem er helsta skilyrði þess að íslenskt lið komist þarna inn."Þetta er erfitt viðureignar fyrir okkur en við höldum þessari umræðu vakandi. Finnar eru heldur ekki með í deildinni; þá langar mikið til að komast inn en hafa ekki haft erindi sem erfiði," sagði Geir, sem vildi ekki útiloka að íslenskt lið kæmist þarna að í framtíðinni. Birgitta Herade, starfsmaður danska knattspyrnusambandsins og talsmaður Royal League, sagði í samtali við Fréttablaðið að hún gæti ekki svarað því hvers vegna íslensku félagsliði væri ekki boðið að vera með. Forsvarsmenn knattspyrnusambandanna í Noregi, Danmörku og Svíþjóð þyrftu að svara því."Ég vil alls ekki útiloka neitt. Skandinavíudeildin gekk framar vonum síðasta vetur, hún stóð undir sér og gott betur og nú erum við að sníða helstu vankantana af til að gera hana ennþá skemmtilegri. Landfræðilega er mjög hentugt fyrir þessi þrjú lönd að vinna saman og þau hafa náð góðum árangri á Evrópumótunum í gegnum tíðina. Finnland vill líka vera með og einnig hefur frést af áhuga Eystrasaltslandanna," sagði Birgitta. Guðmundur Árni segir slæmt að setja á eins konar Norðurlandamót án þess að Ísland sé þar með. "Við myndum fagna öllum tilraunum KSÍ til að tryggja það að íslenskt lið væri þar inni."Það er deginum ljósara að algjör bylting yrði fyrir íslenska knattspyrnu að fá aðgang að Royal League en það virðist því miður aðeins vera fjarlægur draumur.