Milan-menn muna eftir Istanbul

Andriy Shevchenko hefur varað félaga sína í liði AC Milan við því að vera of fljótir að gleyma martröðinni í Istanbul í vor, þegar liðið glutraði niður þriggja marka forystu og tapaði í úrslitaleik Meistaradeildarinnar. "Við verðum að hafa það hugfast í keppninni í ár að þegar maður er að spila í Meistaradeild, er ekkert pláss fyrir mistök," sagði Úkraínumaðurinn, sem nýverið hjálpaði landsliði sínu að komast á fyrsta stórmót sitt í knattspyrnu. "Sú staðreynd að við skulum einmitt mæta liði frá Istanbul í fyrsta leik keppninnar í ár, er einmitt góð áminning um það að menn verða að vera á tánum frá fyrstu mínútu," sagði hann, en Milan mætir Fenerbahce annað kvöld í Meistaradeildinni.