88 ára á 88 höggum

88 ára gamall Íslendingur, Stefán Þorleifsson, náði þeim ótrúlega árangri um síðustu helgi að leika 18 holu golfhring á jafnmörgum höggum og árin hans, eða 88 höggum. Afar fáheyrt er að maður á þessum aldri leiki golf svo vel eins og Stefán sem afrekaði þetta á golfmóti Golfklúbbs Norðfirðinga. Stefán lék hringinn á 88 höggum eða 18 höggum yfir pari og hafnaði í 24. til 29. sæti af 107 keppendum. Stefán fékk 6 pör, 7 skolla og 5 skramba. Ríkisútvarpið greindi frá þessu í dag.