Ágrip af sögu Baugsmálsins

28. ágúst 2002 - Reykjavík Efnahagsbrotadeild ríkislögreglustjóra gerir húsleit í höfuðstöðvum Baugs Group í Reykjavík. Leitin á rætur í ásökunum Jóns Geralds Sullenbergers, forsvarsmanns bandaríska heildsölufyrirtækisins Nordica, um auðgunarbrot Tryggva Jónssonar forstjóra og Jóns Ásgeirs Jóhannessonar stjórnarformanns Baugs. Rannsóknin nær einnig til Jóhannesar Jónssonar. Rannsóknin beinist að því að Jón Ásgeir og Tryggvi, stjórnendur Baugs Group, hafi látið Baug greiða tilbúna og ranga reikninga vegna kaupa á skemmtibáti í Bandaríkjunum, sem þeir töldust eiga með Jóni Gerald. Sakargiftir lúta einnig að því að gefinn hafi verið út tilhæfulaus reikningur í nafni Nordica að undirlagi stjórnenda Baugs og hann síðan gjaldfærður hjá Baugi. Samanlagt er um að ræða um 90 milljónir króna á þáverandi gengi.   28. ágúst 2002 - London Sama dag vinnur Philip Green og félag hans Taveta Investments Ltd að yfirtökutilboði í fataverslunarkeðjuna Arcadia ásamt Jóni Ásgeiri og Baugi. Þriggja missera tilraunir Jóns Ásgeirs til kaupa á Arcadia virðast ætla að bera árangur í samstarfi við Green, sem Jón Ásgeir hafði sjálfur talið á að vera með í kaupunum. Jón Ásgeir og fleiri eiga þegar í þessum tímapunkti um fimmtung í félaginu. Tilboðið nemur 90 til 100 milljörðum íslenskra króna. Jón Ásgeir bregður sér frá samningagerðinni og fær fregnir af húsleit í höfuðstöðvum Baugs í Reykjavík. Jón Ásgeir segir Green, Stuart Rose, forstjóra Arcadia og öðrum viðstöddum að um smávægilegan vanda sé að ræða heima fyrir.   29. ágúst 2002 - London - Reykjavík Philip Green og Taveta leggja fyrir stjórn Arcadia lokatilboð um yfirtöku á félaginu og tilkynning þar um er send Kauphöllinni í London. Fjölmiðlar í Bretlandi birta þá um morgunin frétt um húsleit lögreglunnar í höfuðstöðvum Baugs á Íslandi. Philip Green, Stuart Rose og öðrum viðskiptafélögum Jóns Ásgeirs er brugðið og gremst að Jón Ásgeir skyldi ekki upplýsa þá um málið. Green aftekur að Jón Ásgeir og Baugur geti leitt viðskiptin og kaupin til enda í þessu nýja ljósi. Áreiðanleiki hafi verið dreginn í efa og skaðinn sé skeður. Lögreglurannsókn sé afar alvarlegt mál í heimi viðskiptanna, að minnsta kosti í Englandi. Green óttast að vandræði Jóns Ásgeirs og Baugs skaði hans eigin veldi og orðstír og litlu máli skipti að Baugur hafi stöðu brotaþola. Málið vekur umtalsverða athygli í breskum fjölmiðlum. Jón Ásgeir, Tryggvi, forstjóri Baugs Group og fleiri eru yfirheyrðir hjá efnahagsbrotadeild ríkislögreglustjóra.   4. september 2002 - London Philip Green vill kaupa hlut Jóns Ásgeirs og tengdra aðila í Arcadia. Enda samþykki breski fjármálamarkaðurinn ekki þátttöku Jóns Ásgeirs í viðskiptunum í ljósi lögregluaðgerðanna hjá Baugi. Jón Ásgeir vill ekki ganga að afarkostum og reynir enn samningaleið.   6. september 2002 - London - Reykjavík Stjórn Arcadia ákveður að mæla með tilboði Philips Green, sem hann gerði opinberlega degi áður. Tilboðið nemur alls um 105 milljörðum króna. Í tilkynningu til Kauphallar Íslands kemur fram að Green kaupi liðlega 20 prósenta hlut Baugs Group á 408 pens hlutinn eða fyrir um 21 milljarð króna. Jón keypti sína fyrstu hluti í félaginu á innan við 40 pens hlutinn. Green og Taveta Investments gengur vel að fjármagna kaupin. "Ég gerði Jón Ásgeir að ríkum manni. Getur hann beðið um meira," er haft eftir Philip Green. Þótt upphafleg áform Jóns Ásgeirs og félaga hafi ekki gengið eftir er hagnaðurinn af viðskiptunum mikill eða nærri átta milljarðar króna.   1. mars 2003 - Reykjavík Fréttablaðið birtir gögn sem sögð eru benda til þess að Davíð Oddsson forsætisráðherra hafi vitað um Jón Gerald Sullenberger átta mánuðum fyrir húsleitina í höfuðstöðvum Baugs. Davíð hefði að vísu talað um Jón "Gerhard" Sullenberger í samtali við Hrein Loftsson á fundi í London í ársbyrjun 2002. Hreinn varaði stjórn Baugs við einhvers konar yfirvofandi aðgerðum samkeppnisyfirvalda gegn félaginu eftir fundinn með Davíð í London. Fram kom meðal annars í minnisblaði af stjórnarfundi, að Þorgeir Baldursson, þáverandi stjórnarmaður í Baugi og formaður fjáröflunarnefndar Sjálfstæðisflokksins, hefði talað um að "valdamiklir aðilar í viðskiptalífinu hefðu miklar áhyggur" vegna forsætisráðherra.   3. mars 2003 - Reykjavík Davíð Oddsson forsætisráðherra er gestur í fyrsta þætti Morgunvaktar Ríkisútvarpsins. Þar segir Davíð meðal annars: Ég get sagt frá því, að á þessum fundi okkar Hreins Loftssonar, fyrst þú nefnir hann, þá sagði hann mér frá því, að Jón Ásgeir í Baugi hefði sagt sér, að það þyrfti að bjóða mér 300 milljónir króna gegn því að ég léti af ímyndaðri andstöðu gegn fyrirtækinu. Ég lét nú Hrein segja mér þetta tvisvar og hann sagði mér það tvisvar, að Jón forstjóri hefði nefnt við sig, að það þyrfti að bjóða mér 300 milljónir króna. Ég var nú svo þrumulostinn og Hreinn sjálfsagt sá það nú og sagðist hafa sagt við forstjórann: Þú þekkir ekki forsætisráðherrann. Það þýðir ekkert að bera á hann fé. Þá hafði Jón þessi að sögn Hreins Loftssonar sagt: Það er enginn maður, sem stenst það að fá 300 milljónir, sem hvergi koma fram, hvergi er greiddur skattur af og greiddar eru inn á reikning hvar sem er í heiminum."   4. mars 2003 - Reykjavík Hreinn Loftsson, stjórnarformaður Baugs segir meðal annars í samtali við Morgunblaðið: "Þá gat ég þess, að Jón Ásgeir hefði sagt í hálfkæringi, að það væri kannski rétt að borga honum (Davíð) 300 milljónir inn á reikning í útlöndum... Þetta ítrekaði ég við hann í morgun, þegar Davíð hringdi í mig áður en hann fór í útvarpið. Þá ítrekaði ég að þetta hefði verið sagt undir þessum kringumstæðum í hálfkæringi og engin alvara hefði verið á bak við." Jón Ásgeir segir sama dag í viðtali við Morgunblaðið: "Það má hugleiða hvers vegna forsætisráðherra kemur fram með slíkar ásakanir núna, snemma á mánudagsmorgni. Mér sýnist að forsætisráðherra hafi kannski lent í enhverjum vandræðum með það hvernig hann ætti að svara því sem fram kom í Fréttablaðinu á laugardaginn, um að hann hafi á þessum fundi með Hreini í fyrra rætt um Jón Gerald Sullenberger og Nordica. Því tel ég að forsætisráðherra hafi samið þessa sögu um helgina og mætt með hana í morgunútvarpið."   30. september 2003 - London Meint innherjasvik hjá bresku verslanakeðjunni Iceland, hlutdeildarfélagi Baugs Group, rannsökuð hjá opinberri stofnun í Englandi sem fæst við efnahagsbrot.   17. nóvember 2003 - Reykjavík Fulltrúar embættis skattrannsóknarstjóra ríkisins og lögreglunnar, 15 til 20 manns, gera húsleit hjá Baugi Group og Gaumi. Krafist er að afhent verði bókhald og fylgiskjöl þess og önnur gögn er varða reksturinn 1998-2002. Bréf, tilboð, samningar og fleira einnig tekið af lögreglunni.   29. apríl 2004 - Lúxemborg Lögreglan í Lúxemborg leggur hald á gögn um Baug og Gaum í Kaupthing Bank í Lúxemborg. Liður í rannsókn efnahagsbrotadeildar ríkislögreglustjóra.   7. janúar 2005 - Reykjavík Baugi Group gert að greiða um 465 milljónir króna við endurálagningu ríkisskattstjóra fyrir árin 1998 til 2002. Forsvarsmenn Baugs segja að megnið af þeirri fjárhæð sem félaginu sé gert að greiða sé vegna vantalins söluhagnaðar við samruna Hagkaupa, Bónuss og fleiri félaga þegar Baugur var stofnaður 1998.   1. júlí. 2005 - Reykjavík Sex manns ákærðir í Baugsmálinu, þeirra á meðal Jóhannes Jónsson og börn hans Jón Ásgeir og Kristín. Að auki Tryggvi Jónsson fyrrverandi forstjóri Baugs og endurskoðendurnir Stefán Hilmarsson og Anna Þórðardóttir. Tæplega þriggja ára rannsókn efnahagsbrotadeildar ríkislögreglustjóra er þar með lokið. Ákæran er í 40 liðum en ekki birt.   6. júlí 2005 - Reykjavík - London Bresk blöð segja samstarf við Baug Group um kaup á Somerfield keðjunni í uppnámi vegna kæru á hendur forstjóra Baugs. Mikið fjallað um ákærurnar og einstök efnisatriði í breskum fjölmiðlum. Viðmælendur Fréttablaðsins í London segja umræðuna sérstaklega slæma fyrir Baug en einnig fyrir aðra Íslendinga í viðskiptum þar. - Danskir fjölmiðlar einnig farnir að fjalla um málið.