Forsetinn gaf górillum nafn

Þrjátíu sjaldgæfum fjallagórillum voru gefin nöfn í þjóðgarði í Rúanda á laugardag og var forseti landsins, Paul Kagame, viðstaddur athöfnina. "Þessi athöfn endurspeglar menningu okkar. Við gerum það sama innan fjölskyldnanna í Rúanda þegar við skírum börnin okkar," sagði yfirmaður dýraverndarstofnunar Rúanda. Rúanda reynir að bæta ímynd sína eftir fjöldamorðin árið 1994 og eru górillubörnin tákn þess sem landið hefur upp á að bjóða. Stjörnur dagsins voru þó górillutvíburar, þeir einu sem vitað er til að hafi náð eins árs aldri. Þeir hlutu nöfnin Byishimo, sem þýðir hamingja, og Impano sem þýðir gjöf.