Urðu bensínlausir eftir innbrot

Tveir menn, 22 og 25 ára gamlir, voru í Héraðsdómi Austurlands í gær dæmdir í mánaðarfangelsi hvor, en báðir eru dómarnir skilorðsbundnir í tvö ár. Þá er þeim gert að greiða hvor um sig Olíuverslun Íslands hf. 51.790 krónur með vöxtum. Þeir brutust í félagi við þrjá aðra unga menn inn í söluskála Olís í Neskaupstaðí byrjun desember sl. Meðal þess sem þeir stálu voru DVD diskar, sígarettupakkar, sólgleraugu, jólasveinahúfur og smokkapakki. Þá stálu þeir bíl og ætluðu til Akureyrar, en skildu við hann bensínlausan nærri Laugum í Reykjadal.