Keikó vildi aldrei frelsi

Keikó vildi aldrei frelsi og elskaði þá athygli sem hann fékk hjá mannfólkinu, samkvæmt nýrri bók um háhyrninginn sem ber heitið Keikó talar. Höfundurinn, Bonnie Norton, segist hafa skýr skilaboð frá háhyrningnum. Bonnie Norton er svokallaður dýrahvíslari, þ.e. hún getur náð sambandi við dýr og talað við þau. Hún talaði reglulega við Keikó meðan hann dvaldi í sædýrasafninu í Newport í Oregon í Bandaríkjunum. Í bók sinni, sem meðal annars er til sölu á Amazon.com, lýsir Bonnie samtölum sínum við Keikó. Þar segir að Keikó hafi aldrei viljað frelsi því eftir að hafa dvalið í um tvo áratugi meðal manna hafi hann elskað athyglina sem hann fékk.  Aðspurð hvernig hún hafi talað við Keikó segist Bonnie ýmist hafa heyrt eitt eða tvö orð í einu eða heilar setningar, en stundum hafi hún fengið skilaboðin í formi tilfinninga. Þótt ótaldir kílómetrar hafi skilið Bonnie og Keikó að, eftir að hann var fluttur frá Oregon til Íslands árið 1998, þá tókst henni að vera í fjarskiptasambandi við hvalinn. Hún segir að þegar honum hafi verið sleppt undan ströndum Íslands hafi komið fram í fréttum að Keikó væri frjáls og þrifist vel. Það hafi þó komið Bonnie á óvart því hann hafi alltaf sagt sér og öðrum að hann færi aldrei. Hún hafði því samband við hann úr fjarlægð og það fyrsta sem hann sagði var: „Komi fólkið ekki til mín kem ég til fólksins.“ Bonnie spurði þá hvernig hann færi að því þegar hann væri í sjónum og hvalurinn svaraði því til að hann hefði ekki alveg hugsað það til enda. „Þremur vikum síðar birtist hann og synti með börnum í Noregi. „Ég tel þetta vera sterkt merki um hve raunverulegt þetta er,“ segir Bonnie.  Og Bonnie er með þau skilaboð frá Keikó að honum hafi fundist það vera hlutverk hans að hafa áhrif á þá sem heimsóttu hann. „Það er svo kaldhæðnislegt að hann vildi að fólk lærði eitthvað af fangavist hans,“ segir Bonnie Norton, dýrahvíslari í Oregon.