Bjargaði stúlku úr brennandi bíl

Jón Ólafsson sem særðist í bílsprengjuárás á laugardaginn var bjargaði ungri stúlku úr bíl sem var nær alelda eftir tilræðið. Írösk stjórnvöld höfðu samband við hann og þökkuðu honum fyrir afrekið að sögn aðstandanda Jóns en sjálfur má hann ekki tjá sig við fjölmiðla meðan málið er í rannsókn. Samkvæmt fréttum ABC fréttastofunnar létust sex og tuttugu og tveir særðust í sprengingunni. Tveir af þeim sem létust voru samstarfsmenn Jóns og voru í sama bíl og hann þegar sprengingin varð. Barnaskóli er skammt frá sprengjustaðnum en ekki fengust upplýsingar um það hvort önnur börn en það sem Jón bjargaði séu á meðal hinna slösuðu. Hryðjuverkasamtökin Al Qaeda hafa lýst ábyrgðinni á hendur sér. Ólafur E. Magnússon, faðir Jóns, talaði við hann í gærmorgun og segir son sinn vera við ágætis heilsu en hann brann á hendi og fékk sár í andliti. Þetta er ekki fyrsta sprengjutilræðið sem hann verður vitni að en þó það alvarlegasta. Ættingjar Jóns segja að til hafi staðið að hann fengi á næstu dögum að fara í nokkra vikna frí til Filipseyja þar sem hann býr ásamt þarlendri eiginkonu sinni. Í gær var það þó ekki alveg víst þar sem öryggisþjónustufyrirtækið sem hann starfar fyrir býr við mikla manneklu eftir þetta sprengjutilræði. Jón er þó ekkert á því að láta af störfum sínum í Írak og hefur fullan hug á að snúa þangað aftur að fríi loknu. Jón starfar hjá bandaríska fyritækinu CTU Consulting en það sérhæfir sig í öryggisgæslu og er með fjölmörg verkefni í Írak af því er fram kemur á vefsíðu fyrirtækisins. Að sögn Þóris Guðmundssonar upplýsingafulltrúa Rauða Krossins á Íslandi eru fáir starfsmenn Rauða Krossins í Írak og hafa engir fulltrúar verið sendir frá Íslandi síðan síðla árs 2003. Því veldur að hjálpar- og öryggisfulltúar eru sjálfir farnir að vera skotmark á þessum átakasvæðum en það er afar óvenjulegt annarsstaðar.