Eldgos á Súmötru

Mikill viðbúnaður er á Súmötru eftir að eldfjallið Talang á norðvestanverðri eyjunni tók að gjósa. Þá hafa tvö önnur eldfjöll í Indónesíu látið á sér kræla. 25.000 manns sem búa í námunda við Talang-fjall flýðu heimili sín í gærmorgun eftir að gosmökkur tók að stíga upp af fjallinu. Öskufalls varð vart í hlíðum þess en ekki hefur orðið vart hraunrennslis. Skynjarar í hlíðum Anak Krakatá, syðst á Súmötru, og Tangkuban Prahu á Jövu mældu aukna virkni í fjöllunum. Jarðfræðingar telja að eldvirknin tengist jarðskjálftunum miklu sem orðið hafa undan ströndum Súmötru undanfarna mánuði. Að sögn Ómars Valdimarssonar, sendifulltrúa Rauða krossins á Súmötru, eru hjálparsamtök á svæðinu þegar farin að aðstoða þá sem flýja þurftu heimili sín. Tjöldum hefur verið slegið yfir flóttamennina og þeim gefinn matur. Hann segir fólkið afar óttaslegið enda hefur mikið gengið á síðustu daga. Þar við bætist landlæg hjátrú og nefnir Ómar að forseti landsins hafi verið hvattur til að slátra þúsund kindum til að friða guðina svo óáraninni linnti.