Öryggi á varnarliðssvæði eykst

Öryggi við svæði Varnarliðsins í Keflavík er talið aukast mikið eftir að sett var upp 130 milljóna króna hlið og reglur um aðgang hertar.  Það voru sýslumaðurinn á Keflavíkurflugvelli og yfirmaður varnarliðsins sem opnuðu hliðið formlega í dag. Kostnaður við byggingu hliðsins nam rúmum 130 milljónum króna en verkið hefur staðið yfir frá því í nóvember 2003. Í aðalhliðinu verður vegabréfaskoðun og þar verða allar aðgangsheimildir þeirra sem eiga erindi inn á varnarsvæðið afgreiddar. Girðingar á svæðinu voru einnig færðar og bílastæðum komið fyrir. Svokallað Grænáshlið, sem er eins konar aukahlið, verður áfram opið en eingöngu fyrir flutningabíla. Öryggi við varnarstöðina er talið aukast mikið en strangari reglur munu gilda um aðgang að varnarsvæðinu. Jóhann R. Benediktsson, sýslumaður á Keflavíkurflugvelli, segir að tekin hafi verið í gagnið nýjasta tækni varðandi útgáfu aðgangspassa. Mörgu hafi verið breytt og aðbúnaður starfsfólks hafi batnað. Vonandi hafi þetta í för með sér betri þjónustu fyrir þá sem þurfi inn og út af varnarstöðinni.