Lögfræðingur fylgdi íbúum á fund

Forsvarmenn íbúa Hjallahverfis í Kópavogi mættu á fund skipulagsyfirvalda bæjarins og forsvarmanna Brimborgar með lögfræðing sér við hlið. Íbúarnir mótmæla fyrirhugaðri byggingu Brimborgar á lóð gróðrarstöðvarinnar Birkihlíð sem stendur á grænum reit. Heiðar Þór Guðnasson, talsmaður íbúa í Hjallahverfi, segir þá vilja að bæjaryfirvöld skipuleggi Dalveginn í heild. Þeir geti ekki sætt sig við aukna umferð um íbúðarhverfið. Heiðar segir íbúana undrandi á að bílaumboðið reiði fram 165 milljónir fyrir grænt svæði án vilyrðis bæjarins um að bygging þeirra fái að rísa. Birgir H. Sigurðsson, skipulagsstjóri Kópavogsbæjar, sagði fyrir fundinn að Brimborg hefði ekkert vilyrði fengið. Málið verði skoðað frá öllum hliðum. Egill Jóhannsson, framkvæmdastjóri Brimborgar, segir fyrirtækið ætla að fara að leikreglum þannig að allir geti verið sáttir í lokin: "Við erum ekki á hraðferð og viljum velja bestu lausnina fyrir íbúana, bæinn og okkur."