Óskarsverðlaunin handan við hornið

Fræga og fallega fólkið er komið á stjá í Hollywood og lætur nú sjálfsagt púðra á sér nefið og laga hárið í ofboði því eftir fáeinar klukkustundir hefst glæsilegasta kvikmyndaverðlaunahátíð ársins: Óskarsverðlaunin. Það er ennþá unnið hörðum höndum í Hollywood enda meira en að segja það að vera við Óskarsverðlaunahátíðina - og þarf meira til en kælt kampavín og bónaða limmúsínu. Samkvæmt bandarískum fjölmiðlum láta stjörnurnar sprauta sig upp: collagen í varir, sílikon í barminn og botox bæði í ennið, til að losna við hrukkur, og handarkrikana, til að svitna ekki í sparifötunum. Enda eins gott; fatnaður stjarnanna kostar að jafnaði ekkert smáræði, þó að þær borgi að sjálfsögðu ekki krónu. Reyndar þykir mörgum hönnuðum og skartgripasölum svo mikils virði að stjörnurnar séu vafðar inn í sköpunarverk þeirra, að þær fá borgað fyrir það - upp undir fimmtán milljónir króna. Og þeir sem tilnefndir eru í stóru flokkunum - besta mynd og bestu leikarar - fá gjafir. Undanfarið hálft ár hafa fyrirtæki barist um að koma sínum varningi í gjafapokann þar sem allt frá gerviaugnahárum úr minkahárum til kasmírnáttfata og rándýrra ferðalaga er að finna, alls að verðmæti ríflega sex milljónir króna. Kynnir hátíðarinnar í ár er kjaftfori grínistinn Chris Rock sem lýsti því meðal annars yfir nýlega að einu karlarnir sem hann þekkti og horfðu á hátíðina væru hommar. Framleiðendur sjónvarpsútsendingarinnar vonuðust til þess að Rock laðaði fleiri áhorfendur að, en kvikmyndagagnrýnandi fréttatímaritsins TIME efast um að það dugi, þó ekki væri nema vegna þess að flestar þeirra mynda sem tilnefndar eru í ár drógu fáa áhorfendur í bíó - engin stóru myndanna hefur náð 100 milljón dollara markinu sem er markmið allra kvikmyndaframleiðenda. Engu að síður bíða margir spenntir eftir því að sjá hverjir sigra og kannski ekki síður hverjir gera sig að fífli. Það er hægt að fylgjast með því í beinni á Stöð 2 í nótt.