Opnar ótal möguleika

Flugleiðir og flugvélaverksmiðjan Boeing undirrituðu í gær samning um framleiðslu á tveimur Boeing 787 Dreamliner-breiðþotum fyrir áætlunarflug Flugleiða og kauprétt á fimm vélum til viðbótar. Flugvélarnar verða afhentar árið 2010. Heildarverðmæti vélanna tveggja er fimmtán milljarðar króna og verði kauprétturinn nýttur er heildarverðmæti samningsins rúmlega 50 milljarðar króna. Boeing 787 er langdrægari en aðrar vélar í flota Flugleiða. Núverandi markaðssvæði fyrirtækisins telur um 700 milljónir íbúa, en nýju Boeing-vélarnar munu geta flogið beint til næstum hvaða staðar sem er í heiminum. Hannes Smárason, stjórnarformaður Flugleiða, segir að með samningnum sé fyrirtækið að horfa til framtíðar og í kaupunum felist yfirlýsing um vöxt í starfsemi Flugleiða á næstu árum. "Við munum þróa leiðarkerfi okkar á nýja og fjarlægari staði á næstu fimm árum." Hannes segir vélina henta vel til flugs á vesturströnd Bandaríkjanna þangað sem Flugleiðir eru þegar byrjaðar að fljúga. "Við erum líka klárlega að líta til Asíu og Rússlands. Þar gætu stórir markaðir opnast fyrir okkur en þar eru óteljandi möguleikar í til dæmis fraktflugi." Marlin Daily, varasölustjóri Boeing í Evrópu og Mið-Asíu sagði að kaupsamningurinn væri til marks um að Flugleiðir einbeittu sér ekki aðeins að deginum í dag, heldur hefðu líka sýn til að nýta sér tækifærin sem liggja handan við hornið. Nýju Boeing 787 flugvélarnar taka 220 til 280 farþega auk tuttuga tonna í frakt. Vélin er 60 metra löng, með 56 metra vænghaf og 15.700 kílómetra flugdrægni. Vélinni er ætlað að vera svar Boeing við Airbus-flugvélinni sem mun taka fleiri farþega en nokkur önnur vél í heiminum. Flugleiðir eru fyrsta flugfélagið í Evrópu til að festa kaup á Boeing 787 flugvélum, en fimmtán önnur flugfélög í heiminum hafa einnig gert kaupsamning við Boeing.