Fjöldi húsa við Laugaveg rifinn

Borgarstjórn hefur samþykkt niðurrif á þriðja tug gamalla húsa við Laugaveg. Það er þó algerlega á huldu hvernig þær byggingar munu líta út sem fylla munu skörðin. Segja má að um sé að ræða nokkurs konar sáttargerð milli athafnamanna sem vilja að uppbygging eigi sér stað við Laugaveg og þeirra sem vilja vernda þau hús sem við hann standa. Elsta húsið er 120 ára en öll voru þau byggð fyrir árið 1918. Búast má við töluverðu tilfinningaróti hjá þeim sem unna Laugaveginum og þeirri „kaótísku“ mynd sem á hann er kominn, þrátt fyrir að aðeins einn borgarfulltrúi, Ólafur F. Magnússon, hafi hreyft við mótmælum. Enn hafa tilllögurnar ekki komið til umfjöllunar hjá Húsafriðunarnefnd og eftir er að semja við eigendur húsanna. Annars er búist við að niðurrif hefjist innan skamms.   Pétur Ármannsson arkitekt er varaformaður Húsafriðunarnefndar og átti hlutdeild í þeirri tillögu sem nú er formlega komin inn á deiliskipulag. Hann segist geta sætt sig við þau rök fyrir því að efla þurfi Laugaveginn með framkvæmdunum, þótt hann sé mikill húsverndarmaður, því það sé líka í þágu húsverndunar að gatan lifi og eignirnar verði verðmætar. Þau hús sem eftir verða skuli þá sómi sýndur ohg gerð falleg.  Gert er ráð fyrir að nútíma verslunarhúsnæði muni rísa í stað þeirra húsa sem hverfa, en hvernig þau koma til með að líta út veit enginn enn. Það þarf þó ekki að leita víða í miðborginni til að sjá að það hefur ekki alltaf tekist vel til þegar ný hús rísa við hlið gamalla. Pétur segist óttast það aðeins að forljótir kumbaldar rísi og Laugavegurinn verði annar en hann er en skoða verði hvert skarð fyrir sig og meta hvað sé til bóta. Hann bendir á Barcelona þar sem ný byggingarlist falli alveg átakalaust að þeirri sem fyrir er. Aðspurður hvort íslenskir arkitektar kunni þá list segir Pétur að þeir megi bæta sig,