6% stjórnarmanna konur

Konur skipa aðeins sjötta hvert sæti í stjórnum íslenskra lífeyrissjóða. Hlutfallið er enn lægra þegar kemur að stjórnum fyrirtækja í Kauphöll Íslands, en innan við sex prósent stjórnarmanna eru konur.  „Þar sem peningar eru, þar eru konur ekki.“ Þannig hljóðar fyrirsögn greinar í Lögmannablaðinu um jafnréttismál en ný könnun staðfestir að þetta á við um stjórnir þeirra fyrirtækja og sjóða sem höndla með mesta fjármuni í íslensku þjóðlífi. Nú þegar tími aðalfundanna fer í hönd kjósa formenn fjögurra fagfélaga kvenna að vekja athygli á þessari stöðu mála, en þetta eru formenn félaga kvenna í læknastétt, endurskoðun, lögmennsku og verkfræði. Hlutfall kvenna í stjórnum 32 fyrirtækja sem skráð eru í Kauphöll Íslands er nú tæp sex prósent. Það þýðir að í sjö manna stjórn fyrirtækis er hlutfall kvenna innan við hálf kona að meðaltali á móti sex körlum, og reyndar hálfum betur. Sérstök athygli er vakin á stjórnum lífeyrissjóða. Hlutfall kvenna þar jafngildi því að þar sé ein kona að jafnaði í hópi sex stjórnarmanna. Bent er meðal annars á að í átta manna stjórn lífeyrisjóðs verslunarmanna séu aðeins tvær konur þótt konur séu 60 prósent sjóðsfélaga. Engin kona sé í stjórn lífeyrissjóðs bankamanna þótt 70 prósent sjóðsfélaga séu konur. Aðeins í Lífeyrisjóði starfsmanna sveitarfélaga séu konurnar fleiri í stjórn en karlar. Sif Konráðsdóttir, formaður Félags kvenna í lögmennsku, segir þetta ekki hægt og að það gerist eitthvað ef þetta fari ekki að lagast. Og það getur orðið breyting þarna á á næstu mánuðum ef þeir sem skipa í stjórnirnar átta sig á að það sé núna sem þetta þurfi að breytast að sögn Sifjar.. Formaðurinn segist ekki mæla með kynjakvóta heldur hvetji félagið konur til þátttöku og karla til að styðja konur til þátttöku.