Fleiri gista á hótelum

Á sama tíma og erlendum ferðamönnum um Flugstöð Leifs Eiríkssonar fjölgaði um tæp þrettán prósent milli áranna 2003 og 2004, fjölgaði gistinóttum á heilsárshótelum um tæp níu prósent. Næturnar voru 965.109 í fyrra en 889.390 árið á undan. Gistinóttunum hefur fjölgað um tæp 37 prósent frá 1998. Dóra Magnúsdóttir, markaðsstjóri ferðamála hjá Höfuðborgarstofu, segir mismun fjölgunar ferðamanna og gistinátta sýna að fólk fari í styttri ferðir en áður. Það skýrist meðal annars af því að flugsætum hafi fjölgað og verð lækkað: "Aukin samkeppni gerir það að verkum að auðveldara er fyrir fólk að taka ákvarðanir með stuttum fyrirvara og skella sér til Íslands." Tölur Hagstofunnar sýna að gistinóttum fjölgaði í öllum landshlutum utan Norðurlands þar sem samdráttur nam tæpu einu prósenti milli áranna. Ásbjörn Björgvinsson, formaður Ferðamálasamtaka Norðurlands Eystra, segir tölur Hagstofunnar ekki gefa rétta mynd af gistinóttum þar sem heilsárshótel á Norðurlandi séu fá: "Við höfum farið fram á að allar gistinætur á svæðinu séu teknar saman en ekki aðeins nætur á heilsárshótelum." Ásbjörn segir unnið að því að fá fleiri erlenda ferðamenn á veturna. Sextán prósenta fjölgun gistinátta milli desembermánaða 2003 og 2004 sýni þau skref sem tekin hafi verið: "Í Mývatnssveit hefur ferðamönnum fjölgað þar sem framboð á afþreyingu yfir vetrartímann hefur markvisst verið aukið." Einnig megi rekja fjöldann til þess að skíðasvæði á Norðurlandi hafi opnað fyrr en áður. Í desember fjölgaði gistinóttum um tæp átta prósent á milli ára, voru 34.720 árið 2003 en urðu 37.390. Þeim fjölgaði hlutfallslega mest um 38 prósent á heilsárshótelum á Suðurnesjum, Vesturlandi og Vestfjörðum. Gistinóttum á hótelum á höfuðborgarsvæðinu fjölgaði á sama tíma um rúmt eitt prósent. Heilsárshótelum hefur fjölgað um fjögur milli áranna. Voru 66 árið 2003 en 70 í fyrra.