Veikjast vegna kjarnorkuúrgangs

Íbúar í strandþorpum Sómalíu veikjast í stórum stíl vegna geislavirks kjarnorkuúrgangs, sem skolaði þar á land í flóðbylgjunni í kjölfar jarðskjálftans í Asíu. Ítölsk og svissnesk fyrirtæki eru sögð hafa losað sig ólöglega við úrganginn á hafsvæðinu við landið. Flóðbylgjan sem reið yfir Suðaustur-Asíu í kjölfar jarðskjálftans á annan dag jóla hafði áhrif víða og þau eru enn að koma í ljós. Geislavirkum kjarnorkuúrgangi, sem hefur í tíu ár verið losaður ólöglega í sjóinn við strendur Afríku, skolaði á land í Sómalíu. Úrgangurinn er sagður koma frá ítölskum og svissneskum fyrirtækjum, sem eru sökuð um að hafa nýtt sér stjórnleysið í borgarastyrjöldinni í Sómaíu með því að losa sig við þúsundir skipsfarma af kjarnorkuúrgangi við strendur landsins. Í nýrri skýrslu á vegum umhverfisstofnunar Sameinuðu þjóðanna segir að óvenjuleg og alvarleg heilsufarsvandamál séu farin að skjóta upp kollinum í þorpum við ströndina. Nick Nuttall hjá Umhverfisstofnun Sameinuðu þjóðanna segir að greint hafi verið frá margs konar veikindum, blæðingum úr munni og meltingarfærum, húðkvillum og öndunarerfiðleikum. Þessi veikindi hafi valdið miklum áhyggjum en þau hafi komið í kjölfar fljóðbylgjunnar annan dag jóla og eftir að efnageymarnir brotnuðu. Málin er í rannsókn en Sameinuðu þjóðirnar segja enn fremur að alvarlegra og skaðlegra áhrifa muni einnig gæta í nágrannalöndum Sómalíu.