Guðjón Valur skoraði 9 mörk

Íslensku atvinnumennirnir í þýsku úrvalsdeildinni í handknattleik létu vel af sér kveða í leikjum helgarinnar. Gylfi Gylfason skoraði 4 mörk og Robertas Pauzuolis 3 þegar Wilhelmshavener lagði Lubbecke á útivelli, 22-23. Þá skoraði Snorri Steinn Guðjónsson 5 mörk og Einar Hólmgeirsson 4 er lið þeirra, Grosswallstadt, tók á móti Loga Geirssyni og félögum í Lemgo. Lemgo mátti þola eins marks tap, 28-27, en Logi skoraði 6 mörk í leiknum. Göppingen tapaði gegn Flensburg á heimavelli, 26-27, en Jaliesky Garcia skoraði 3 mörk fyrir heimamenn en Andrius Stelmokas, fyrrum leikmaður KA, skoraði 2. Loks var Guðjón Valur Sigurðsson markahæstur með 9 mörk í liði Essen sem burstaði Pfullingen á útivelli, 33-22.