Fyrirtæki meta sjálf líkur á slysi

Mat á líkum á slysum í efnaverksmiðjum í byggð eru í höndum fyrirtækjanna sjálfra sé framleiðsla þeirra undir ákveðnum mörkum. Víðir Kristjánsson, varaformaður Stórslysanefndar, segir það eiga við í tilviki Mjallar Friggjar sem framleiðir klór á Akureyri. Hann segir klórframleiðslu fyrirtækisins þurfa að vera rétt um helmingi meiri svo hættumat verði framkvæmt undir eftirliti óháðra aðila, nema Slökkvilið Akureyrar óski þess sérstaklega. "Stórslysanefndin er ekki eftirlitsaðili heldur sér hún til þess að fyrirtækið hafi stefnumarkandi skjal sem er nokkurskonar mat á áhættu," segir Víðir. Nefndin eigi eftir að fara yfir skjalið en það hafi verið lagt fyrir hana áður, þegar fyrirtækið starfaði í Reykjavík. Slökkvilið Akureyrar hefur áætlaði að leki eitt stórt klórgashylki í verksmiðju Mjallar Friggjar yrði að loka og rýma um 300 metra radíus frá húsinu. Á því svæði eru 200 íbúar. Einnig þarfað aðvara fólk og vernda svæði undan vindi í allt að 2,7 kílómetra fjarlægð. Mest geta tólf tonn verið í verksmiðjunn. Hvert þrýstihylki vegur eitt tonn. Erling Þór Júlínusson, slökkviliðsstjóri á Akureyri, segir greinilegt að fyrirtækið Mjöll Frigg ætli að standa vel að sínum málum. Slökkviliðið sjái því ekki ástæðu til að krefjast frekara hættumats. "Við verðum að gæta sannmælis og réttar starfseminnar. Við megum ekki mismuna fyrirtækinu þannig að við séum að gera til þeirra meiri kröfur heldur en við getum stutt með lögum og reglugerðum," segir Erling. "Þau drög af stefnumarkandi skjali sem við höfum í höndum er mjög gott. Það getur verið að við gerum einhverjar athugasemdir við það en skjalið er vel fram sett af fyrirtækinu," segir Erling. Þá sé það hlutverk slökkviliðins að bregðast við komi eitthvað upp á en forvarnir séu vinnueftirlitsins og heilbrigðiseftirlits. Áhættumat hefur verið unnin fyrir olíubirgðastöðurnar í Örfirisey og Króksfjarðarnesi og gasframleiðslu í Straumsvík.