Engin ábyrgð á Ameríkubílum

Hægt er að hagnast verulega á bifreiðainnflutningi frá Bandaríkjunum, en það er líka hægt að tapa. Þannig eru dæmi um að innfluttir bílar hafi komið bilaðir til landsins eða bilað skömmu eftir komuna og þá getur reynst erfitt fyrir fólk að fá leiðréttingu sinna mála frá seljanda. Engu skiptir þótt viðkomandi bíll sé í ábyrgð því sú ábyrgð gildir aðeins í Bandaríkjunum og eru íslensku umboðin ekki skyldug til að ganga inn í ábyrgðina. Talsverð áhætta fylgir því innflutningi sem þessum, en miðað við þá miklu aukningu sem orðið hefur setja menn það greinilega ekki fyrir sig þegar hagnaðarvonin er annars vegar. Reikna má með að milli fimm- og sexhundruð bílar séu nú fluttir inn frá Bandaríkjunum í hverjum mánuði og hefur innflutningurinn margfaldast frá fyrri árum. Til dæmis jókst innflutningur á pallbílum til Íslands í janúar og febrúar á þessu ári um 400 prósent miðað við sömu mánuði í fyrra. Aðallega eru þetta stórir pallbílar sem fluttir eru inn, bílar sem eru yfir fimm tonn að þyngd og bera því ekkert vörugjald. Lágt gengi dollars gagnvart íslensku krónunni er meginástæða þessarar miklu aukningar á innflutningi bíla frá Bandaríkjunum. Mesta breytingin er að bílainnflutningur einstaklinga hefur margfaldast en í mörgum tilfellum kaupa menn sér bíla gegnum netið og anna skipafélögin varla spurn eftir flutningum til landsins. Dæmi eru um að menn hafi hagnast dável á innflutningi með þessum hætti. Þannig ræddi Fréttablaðið við mann sem keypti tvo Cheerokee jeppa árgerð 2000 á uppboðsvefnum E-Bay í fyrra og flutti til landsins. Hann greiddi um ellefu þúsund dollara fyrir hvorn bíl fyrir sig eða nálægt 1,7 milljónum króna á þáverandi gengi. Miðað við gengi dagsins í dag væru þetta um 1,3 milljónir króna. Maðurinn seldi síðan annan bílinn á 2,4 milljónir króna og hagnaðist þannig um 700 þúsund krónur. Sá hagnaður væri kominn yfir eina milljón króna á gengi dagsins í dag.