Vigdís verndari Neyðarhjálparinnar

Það er jafnan forseti Íslands sem fenginn er til að vera verndari þegar stórum landssöfnunum er hleypt af stokkunum. Í gær gerðist það hins vegar að fyrrverandi forseta, Vigdísi Finnbogadóttur, var fengið hlutverkið en ekki Ólafi Ragnari Grímssyni. Þegar Krabbameinsfélagið efndi síðast til landssöfnunar var forseti Íslands verndari. Lions-hreyfingin sem og Kiwanis hafa jafnan fengið þjóðhöfðingjann til að vernda sínar landssafnanir þegar K-lyklar og Rauðar fjaðrir hafa verið seldar. Rauði krossinn hefur einnig haft forsetann sem opinberan verndara í sínum landssöfnunum. Dæmi er um að forsetafrúin hafi gegnt þessu hlutverki en Dorrit Moussaief var verndari landssöfnunar Sjónarhóls. Þegar landssöfnunin Neyðarhjálp úr norðri var kynnt í gær var hins vegar upplýst að fyrrverandi forseti, Vigdís Finnbogadóttir, yrði verndari. Elín Þorsteinsdóttir, verkefnisstjóri Neyðarhjálpar úr norðri, segir að núverandi forseti, Ólafur Ragnar Grímsson, sé verndari Rauða kross Ísland og fyrir tveimur mánuðum hafi hann verið verndari landssöfnunarinnar Göngum til góðs. Það sem geri þessa söfnun sérstaka sé sú breiðfylking sem að þessu standi, en allar útvarpsstöðvar, sjónvarpsstöðvar og dagblöð landsins komi að henni auk fjölmargra fyrirtækja, einstaklinga og fimm mannúðarsamtaka. Fólkinu sem að þessu stendur hafi þótt það góð hugmynd að fá bæði núverandi og fyrrverandi forseta til að vera með og úr hafi orðið að Vigdís Finnbogadóttir ýti söfnuninni úr vör og Ólafur Ragnar Grímsson verði með þegar söfnunin nær hámarki á laugardagskvöld. Þau séu því bæði með sem sé í anda söfnunarinnar. Eftir átök síðasta árs lýstu andstæðingar núverandi forseta því yfir að hann gæti ekki verið sameiningartákn. Höfðu slík sjónarmið áhrif nú? Elín segist getað fullvissað alla um að svo hafi ekki verið, ekki hafi einu sinni verið rætt um það. Gengið hafið verið út frá því að fá báða aðila til að vera með.