Mikið tap vegna drollaraskapar

Ný innisundlaug var opnuð í Salaskóla í Kópavogi í dag, einu og hálfu ári á eftir áætlun. Aðalverktaki verksins var lýstur gjaldþrota í síðasta mánuði og oddviti Samfylkingarinnar í Kópavogi segir bæjarfélagið hafa tapað að minnsta kosti eitt hundrað milljónum króna á þessum drollaraskap. Það má segja að bygging íþróttamannvirkisins sé ein hrakfallasaga. Það eru tvö ár síðan skrifað var undir samning um byggingu sundlaugarinnar í Salahverfi. Þá var fyrirhugað að laugin skyldi opnuð í september árið 2003, fyrir tæpu einu og hálfu ári. Fljótlega fór hins vegar allt að ganga á afturfótunum. Stjórnendur Kópavogsbæjar létu hins vegar sem ekkert væri og í júní í fyrra sagði Gunnar Birgisson, oddviti Sjálfstæðismanna, að laugin yrði opnuð í ágúst þótt honum mætti ljóst vera, manni með mikla reynslu af slíkum framkvæmdum, að slíkt myndi ekki standast. Þá þegar var orðið ljóst að aðalverktakinn, Ólafur og Gunnar byggingarfélag, ætti í rekstrarörðugleikum enda barst Héraðsdómi Reykjavíkur beiðni um að úrskurða félagið gjaldþrota í júlí í fyrra. Kópavogsbær lét Ólaf og Gunnar engu að síður halda verkinu áfram og í september sagði Sigurður heitinn Geirdal, þáverandi bæjarstjóri, í samtali við fréttastofu að laugin yrði opnuð í október. Það gerðist ekki og þann 1. desember var verktakinn tekinn til gjaldþrotaskipta og yfirtók Kópavogsbær þá framkvæmdina. Flosi Eiríksson, oddviti Samfylkingarinnar í bænum, segir ljóst að loforð við bæjarbúa hafi verið svikin. Að hans mati hafi forystumenn Framsóknarflokksins og Sjálfstæðisflokksins í haust lofað upp í ermina á sér varðandi það hvenær laugin yrði opnuð þó að þeim hafi verið það vel ljóst að það myndi aldrei standast. Hann segist ekki sjá betur en að þetta hafi í för með sér 100 milljóna króna viðbótarkostnað fyrir bæjarbúa út af drollaraskap. Flosi ætlar að spyrjast fyrir um framkvæmd þessa verks á fundi bæjarráðs á morgun. Í morgun sem fyrstu börnin fóru ofan í innisundlaugina í Salakóla en líkamsræktarstöðin þar verður tekin í gagnið eftir nokkra daga. Útisundlaugin verður svo opnuð almenningi með vorinu.