Sex milljarðar í auknum kvóta

Með aukningu loðnukvótans sem Hafrannsóknastofnunin lagði til í gær gætu útflutningstekjur aukist um að minnsta kosti 6 milljarða króna, að mati Friðriks J. Arngrímssonar, framkvæmdastjóra Landssambands íslenskra útvegsmanna. "Miðað við að allur aflinn veiddist og færi allur í bræðslu," sagði hann og kvað útvegsmenn hæstánægða með aukninguna. "Þetta skiptir sköpum, því auðvitað var ekki trygging fyrir einu eða neinu fyrr en að loknum mælingum." Lagður er til aukinn kvóti til íslenskra skipa upp á 556 þúsund tonn. Rannsóknarskipið Árni Friðriksson lauk mælingum á loðnugöngu norður og austur af landinu á sunnudag. Heildarkvótinn verður samkvæmt tillögunni 985 þúsund tonn, en samkvæmt því verður hlutur íslenskra skipa 780 þúsund tonn. Útgefinn bráðabirgðakvóti nam einungis um 224 þúsund tonnum. Reglugerð um kvótaaukninguna er væntanleg á næstu dögum frá sjávarútvegsráðherra. Friðrik taldi að menn mættu hafa sig alla við ef nást ætti að veiða allan kvótann. "Þar spilar auðvitað veðurfar inn í," sagði hann en í fyrra varð bræla í lok tímabils til þess að ekki náðist að veiða allan kvóta. Hjálmar Vilhjálmsson, fiskifræðingur og loðnusérfræðingur Hafrannsóknastofnunar, segir menn hafa verið orðna nokkuð svartsýna eftir að hafa í haust komið úr loðnuleit "með öngulinn í rassinum". Hann taldi hlýrri sjó kunna að hafa valdið breyttri dreifingu loðnunnar á haustin. "En hún er alltaf að koma manni á óvart, nú ánægjulega," sagði hann og taldi það góða undantekningu. Alls mældust út af Norðurlandi 1.272 þúsund tonn af kynþroska loðnu. Hjálmar var um borð í Árna Friðrikssyni í "kolvitlausu veðri" seinni partinn í gær. "Við liggjum undir Langanesi þar til lægir," sagði hann, en skipið er á leið til síldarmælinga austur af landinu.