Ungmenni á skilorði

Málum þriggja ungmenna var í gær lokið strax við þingfestingu í Héraðsdómi Reykjavíkur í gær. Símon Sigvaldason héraðsdómari áminnti 19 ára pilt um að halda sig nú réttu megin laganna eftir að hann hafði undir lok skilorðstíma dóms frá árinu 2003 verið gripinn með lítilræði af tóbaksblönduðu hassi, en þetta var hans fjórða brot á skilorðstímanum. Hann var dæmdur í þriggja mánaða fangelsi, skilorðsbundið, en má búast við að fara í fangelsi við næsta brot. Þá var eldra þjófnaðar- og hylmingarmál 18 ára gamals pars sem bætt hefur ráð sitt sameinað fyrri dómi og þau dæmd í tveggja mánaða fangelsi, skilorðsbundið í tvö ár.